Liberia yakumbwa na ebola, watano wafariki dunia

Liberia imeripoti kesi 11 za watu wanaoshukiwa kuambukizwa ugonjwa wa Ebola huku wengine watano wakifariki dunia kufuatia kuenea kwa maambukizo hayo katika nchi hiyo ya magharibi mwa Afrika. Idara ya Afya ya Liberia imeeleza kuwa kesi hizo ziligunduliwa katika wilaya za Zorzor, Lofa na Foya  huko karibu na mpaka wa pamoja wa nchi hiyo na Guinea.

Bernice Dahn, Afisa Mkuu wa Tiba katika kitengo cha Afya cha Liberia amesema kuwa ugonjwa wa ebola hivi sasa unaenea katika eneo la mpaka na Guinea khususan katika maeneo na miji iliyoko karibu na miji ya Guinea ya Gueckedou, Nzerekore, Kissidougou na Macenta.

 Hii ni katika hali ambayo timu ya uchunguzi tayari imeanza kuchunguza maambukizo hayo ya ebola kama kukusanya sampuli za damu na kuwatafuta watu walioambukizwa.

 Wakati huohuo Peter Clement, Mshauri wa Shirika la Afya Duniani (WHO) nchini Lberia amesema kuwa shirika hilo lipo katika mchakato wa kuthibitisha washukiwa wa maambukizo hayo ya ebola ili kuweza kujua namna ya kukabiliana nayo.