MTU YOYOTE YULE ANAWEZA KUWA BINGWA KATIKA JAMBO LOLOTE ALITAKALO

NA: ANDREA NGOBOLE PMT

Heri ya mwaka mpyaaa wa 2017 ndugu msomaji wa princemediatz blog, facebookpage na instargram ni matumaini yangu kuwa umeuanza mwaka vyema na hatuna budi kumshukuru Mungu kutujalia afya na uzima tele.

Leo nimeona tushirikishane jambo moja kubwa nalo  NI ukweli usiopingika ya kuwa kila mmoja wetu hupenda kuwa mtaalamu wa jambo Fulani ila sasa njia za kuwa bingwa katika jambo husika ndio tabu kuu inayowakabili wengi kwani hatufahamu ni kwa namna gani tunaweza kuwa wataalamu wabobezi katika fani husika.

Mathalani unapenda kuwa mtaalamu wa uchumi, siasa, uandishi wa habari na kadhalika huna budi kwenda chuoni kujifunza utaalamu husika ambapo ni jambo zuri kwani utakuwa ,mtaalamu wa taaluma husika lakini huwezi kuwa bingwa wa taaluma hiyo; sasa huenda hujanielewa naposema kuwa bingwa katika taaluma husika ninamaanisha kuwa uwe mtaalamu mbobezi katika fani husika ndio maana ukienda hospitali kuna madaktari na madaktari bingwa wa magonjwa ya akina mama na watoto, wa mifupa, saratani na kadhalika hii hutokea baada ya wao kujipambanua katika jambo Fulani na kutilia mkazo katika fani husika sasa na wewe unaweza kuwa bingwa katika jambo lolote unalotaka kuwa kama utafanya yafuatayo

Joseph Mayagila mkurugenzi wa mafunzo chuo cha uandishi wa habari na utangazaji Arusha( AJTC) akifundisha katika moja ya semina zilizofundishwa chuoni hapo mwaka 2015 na wanaoonekana pichani pia ni baadhi ya wakufunzi wa chuo hicho wakimsikiliza kwa makini

 

Kwa mujibu wa Joseph Mayagila Mkurugenzi wa mafunzo chuo cha uandishi wa habari na utangazaji Arusha (AJTC) anasema Ili uwe bingwa katika jambo unalolitaka unatakiwa uwe na kitu kinachoitwa ONE HOUR HABIT yaani hii ni tabia utakayoijenga ya kuwa na saa moja la kuifunza jambo hilohilo kila siku katika maisha yako yote na huo muda lazima uuheshimu. 

Kwa mfano kwa siku  moja kuna saa 24 lazima utenge saa 8 za kufanya kazi kama umeajiriwa saa 8 za kufanya shughuli zako binafsi mbalimbali kama utakavyojipangia na saa 8 za kupumzika kwa maaana ya kulala ili kuupumzisha mwili wako na ubongo wako uweze kufikiria mambo ya maendeleo yajayo. 

Sasa katika yale masaa 8 ya kufanya shughuli zako binafsi tenga saa moja kwa maana ya dakika 60 za kujifunza jambo moja ambalo unatamani kuwa bingwa kwa mfano ukitaka kuwa mwanasheria bingwa wa sheria za ardhi inabidi usome vitabu mbalimbali vinavyohusiana na sheria hizo pia ukitaka kuwa mjasiriamali pia jenga utamaduni wa kusoma vitabu vinavyozungumzia maswala ya ujasiriamali vilivyoandikwa na watu waliofanikiwa katika maswala ya  biashara mfano vitabu vya Donald TRUMP ambaye kwa sasa ndiye Raisi mteule wa Marekani 

Mwanzo utakuwa mgumu sana ila jitahidi kwa siku 21 mfululizo ujipe saa moja kujifunza hicho kitu unachotamani kuwa bingwa na muda mzuri Zaidi  ni saa tatu mpaka saa tano za usiku chagua muda sahihi kwako kabla ya kwenda kulala uwe tayari umejifunza kitu katika jambo husika na ukiweza kujenga mazoea ya kusoma vitabu hivyo kila siku kwa hizo siku 21 basi utajenga tabia na ikishakuwa kuwa tabia utajenga mazoea kasha kuwa utamaduni ambao utakufanya ufahamau mambo kwa upana Zaidi juu ya fani husika na ukiweza kufanya kwa miezi 12 mfululizo mwisho wa siku utakuwa bingwa wa taaluma husika ndio utakuwa bingwa wa jambo hilo ulitakalo mmhhh sasa unaweza kuwa mvivu wa kusoma vitabu ila siku hizi mambo yamerahisishwa mno kwani kupitia mitandao ya kijamii kuna Makala mbalimbali zinazozungumzia mada inayohusiana na jambo ulitakalo kujifunza pia vipo vitabu vilivyorekodiwa kwa sauti unaweza kusikiliza na mwisho wa siku kuna jambo utakuwa umejifunza na ukilifanyia kazi utakuwa mtaalamu mbobezi katika jambo husika.

Kwa mfano mie ni mwalimu ili niendele kuwa mwalimu bora Zaidi sina budi kujifunza jinsi walimu wanavyofundisha darasani pia kwenye semina za ujasiriamali, mafunzo ya mikutano ya injiili mfano mwalimu Mwakasege anavyofundisha katika mikutano yake kwa hiyo kila siku ninasoma vitabu vinavyoelekeza jinsi ya kufundisha na pia jinsi kuwaelewa wanafunzi wangu kama wamenielewa katika somo ninalofundisha, ninajifunza kila siku juu ya somo ninalofundisha  kwa kuongeza maarifa mapya yatakayonisaidia kuweza kueleweka mbele ya wanfaunzi wangu nikiwa kanisani najifunza nikiwa mtaani pia najifunza ili kuunoa Zaidi ubongo wangu.

Hivyo basi unaweza kuwa mtaalamu mbobezi ama  bingwa katika jambo lolote lile ulitakalo kama tu utajipa muda wa saa moja la kujifunza kitu kimoja kila siku mpaka uwe muelewa bingwa wa jambo husika, jiulize mtu kuandika kitabu mpaka kikamilike humchukua si chini ya miezi mitatu na ameshirikisha akili za watu wengi mpaka kukamilika kwa kitabu hicho wewe unapokisoma kwa siku moja au saa moja unakuwa umefyonza ubongo wake na maarifa yake ya miezi kadhaa kwa siku moja hapo unakuwa umeongeza maarifa makubwa sana na utaweza kuwa  bingwa wa taaluma husika kama utasoma vitabu na mada Zaidi ya ishirini kwa mwezi mmoja na hii haihitaji kulipia ada kwani ni elimu kubwa unayoipata bure kabisa kwa kujipa muda wa kutosha kjifunza jambo jipya kila siku.

Mwaka huu wa 2017 uwe na lengo moja kubwa nalo ni kuwa bingwa katika jambo ulitakalo anza taratibu na utajikuta unakuwa bingwa wa jambo hilo kama ni mwanamuziki uwe na saa moja ya kujifunza kuimba, kama ni mwandishi kila siku uwe unaaandika Makala moja, kama ni mkulima kila siku uwe na saa moja ya kupata maarifa ya ukulima bora wa zao husika vivyo hivyo katika tasnia yoyote uitakayo naamini utakuwa bingwa wa mabingwa.

Asante kwa kusoma makala hii uwe na mwaka wenye mafanikio tele

NGOBOLE, Andrea Ashery.

0755780131

Read More

Mtangazaji mahiri wa kipindi cha Amplifaya cha Clouds FM Millard Ayo baada ya kufungua studio yake kubwa naya kisasa jijini Dar, ameanza kuuza vipindi vya burudani katika radio mbalimbali za Afrika Mashariki.
millard

Akizungumza Jumamosi hii katika mdahalo wa kuwatia moyo wanafunzi waliofeli kidato cha nne, ambao ulienda sambamba na uzinduzi wa video mpya ya Mrisho Mpoto, Millard alieleza mafanikio yake baada ya kupambana kwa muda mrefu.

“Nilijiuliza kwanini nisitumie uandishi wangu wa habari ili kusambaza habari Afrika?, ndipo nikaanza kujinyima ili nijenge studio yangu kwa pesa yangu mpaka imekamilika. Sasa hivi tayari nimeshaanza kuuza vipindi vyangu katika radio mbalimbali za Afrika, Kenya, Rwanda. Pia nimekuwa reporter wa radio mbalimbali za Afrika Mashariki, pia Nigeria kuna kazi maalum nimepata ambayo nimehifurahia sana,” alisema Millard.

Aliongeza, “Nimeona kama Rwanda na Kenya sasa hivi bongofleva ndiyo imetake over, hawa watu ingawa wanasikiliza muziki, pia wanataka stori mbalimbali za mastaa wa bongofleva. Kwa hiyo mimi nataka kuwaambia watu wangu tusikate tamaa kama ulianguka inuka endelea,”

Pia Millard Ayo alisema yeye ni miongoni mwa wanafunzi ambao walifeli kidato cha nne lakini aliinuka na kuendelea.

Read More

MKURUGENZI wa mafunzo wa chuo cha uandishi wa habari Arusha Bwana Joseph mayagila akifundisha somo la ujasiriamali kwa waandishi wa habari mkoani Arusha hivi karibuni

 

 hapa mkurugenzi huyo akiwa na mkewe mara baada ya kutoa mafunzo ya ujasiriamali kwa wakiana mama wa kanisa la TAG sanawari mkoani Arusha

NA JOSEPH MAYAGILLA, AJTC
 
Kufanikiwa kifedha ni jambo jema na pia ni haki yako ya kiasili ambayo unayo ili uweze kutawala mambo na kutiisha mambo hapa duniani. Hii ni kwasababu kuna mambo ambayo hutaweza kuyatawala wala kuyatiisha hapa duniani mpaka tu pale utakapokuwa umefanikiwa kifedha! Hata hivyo, kufanikiwa kifedha hakujileti kwenyewe, bali ni kitu cha kufanyia kazi, tena chenye wajibu mkubwa unaodai bidii na maarifa kwa kiwango kikubwa. Watu wajinga peke yao, hudhani kufanikiwa kifedha ni bahati ya mtu na kwamba si kitu kinachohitaji mipango! Je unaweza kuvuma maisha ambayo hajayapanda?
Kufanikiwa kifedha kunadai rasilimali!

Kufanikiwa kifedha kunadai kwanza kukuza rasilimali za kichwani mwako kabla ya rasilimali zingine. Duniani kuna rasilimali za aina mbalimbali kama vile rasilimali watu, mali asili yaani ‘natura resources’, rasilimali za kijamii (social resource: ndugu,mila na desturi nzuri ), rasilimali muda na rasilimali za kiroho(spiritual resources), nakadhalika. 

Lakini kama unataka kufanikiwa kifedha rasilimali ya kwanza, ambayo utaitumia kuvuta rasilimali zingine ni “mental resources” yaani rasilimali za kichwani mwako. Jambo la uhakika ni kwamba, hata kama ungekuwa unaishi kwenye kijiji ambacho ardhi yake ni dhahabu , na mito yake ni nishati ya mafuta, lakini kama ukishindwa kukuza rasilimali za kichwani mwako, utaendelea kuwa maskini.

 Hii ni kwasababu rasilimali za kichwani(maarifa) ndiyo rasilimali kiongozi katika uchumi. Kwa mfano, kuna nchi ambazo duniani hazifugi mifugo kama ng’ombe, mbuzi au farasi, lakini ndiyo zinazoongoza duniani kwa kutengeneza na kuuza viatu vya ngozi. Zipo pia nchi ambazo hazina misitu, lakini ndiyo zinazoongoza duniani kwa kutengeneza na kuuza fenicha na magogo. Je unafikili ni kwanini?

Sisi hapa nchini kwa mfano, ni nchi ya tatu Afrika kwa kuwa na mifugo mingi, yaani ng’ombe, mbuzi, kondoo na kuku, lakini hatuna hata kiwanda kimoja cha kutengeneza viatu ambavyo vinaongoza sokoni kitaifa, au kimataifa. Wala hatuongozi kwa kuuza maziwa au nyama Afrika. Na wala hatuongozi kwa kunywa maziwa kwa uwingi, au kula nyama na mayai, na watoto wa nchi hii bado wanasumbuliwa na utapiamlo. Je unafikiri ni kwa nini?
Je nifanyeje ili nikuze rasilimali zangu za kichwani?

Wahenga waliwahi kunena “Maendeleo yoyote ni matokeo ya hali njema iliyojengwa katika fikra za mtu au watu furani kwa wakati furani, yaani “Any development, is a result of a particular state of mind.” Neno “state of mind” humaanisha hali ya ufahamu, au hali ya uelewa, au mtazamo. Hapa inamaanisha kuwa kuna kiwango cha fikra ambacho unatakiwa kukifikia ili uweze kufanikiwa ipasavyo kiuchumi. 

 
Kwa hiyo, jambo la kwanza kama unataka kukuza rasilimali za kichwani mwako kwa kiwango cha juu unahitaji mafunzo ya namna ya kufanywa upya nia au macho ya kiakiri ” kugeuzwa’ au kujigundua kwamba wewe unawito gani wa kufanikiwa kiuchumi. Yaani, ni shughuli gani kuu ambayo ukiifanya maisha yako ya kiuchumi yatabadilika kabisa kabisa na wewe kuwa mtu mwingine kihistoria? Je wito wako wa kufanikiwa ni kwa kufanya nini hapa duniani? Je wewe una vinasaba(DNA) vya kufanya shughuli gani kuu kiuchumi? Kumbuka hukuumbwa ili ufanye kila kitu, Mungu peke yake ndiye kila kitu!

Mwandishi wa makala hii ni Mkurugenzi wa Chuo cha uandishi wa habari na utangazaji cha Arusha Journalism Training College (AJTC) kilichoko kwa Mrombo Arusha. Makala haya ni sehemu ya Mafundisho yaliyomo katika vitabu vyake vinne alivyoviandika ambavyo ni “Fanikiwa Kibiashara”, “Jinsi ya kuwa Tajiri”, “Kubuni Biashara Ikupasayo” na “Je fedha zako ni mbegu au mavuno?”.Vitabu hivi vinapatikana kwa shilingi elfu kumi kwa kila kitabu kimoja. Kama unahitaji vitabu wasiliana nasi 0716 20 15 85 au 0763 20 15 85 au whatsap 0715 76 96 15. 

SHARE MAKALA HII NA MARAFIKI ZAKO WENGINE!

Read More

MABADILIKO MAKUBWA YA KISERA KUINUA WAJASIRIAMALI WADOGO NA WA KATI

Mkuu wa utafiti na machapisho ESRF, Profesa Fortunata Makene akifungua warsha.

Mwasilishaji wa mada Hossana Mpango akizungumza na washiriki (hawapo pichani) kwenye warsha hiyo.

Washiriki wa warsha ya siku moja ya ujasiriamali mdogo na wa kati katika muktadha wa fedha iliyofanyika katika ukumbi wa mikutano wa ofisi za Taasisi ya Utafiti wa Uchumi na Jamii (ESRF).

Na Mwandishi wetu

SERIKALI imetakiwa kufanya mabadiliko makubwa ya kisera kuwezesha kukua kwa viwanda vidogo na vya kati nchini.

Kauli hiyo imo katika utafiti uliofanywa na Taasisi ya Utafiti wa Uchumi na Jamii (ESRF) kuhusu ukuaji wa sekta hiyo katika muktadha wa upatikanaji wa fedha.

Akiwasilisha utafiti huo mmoja wa watafiti Hossana Mpango alisema kwamba kwenye utafiti wao wamebaini mgongano mkubwa wa kisera na utendaji, unaosababisha kukwama kwa maendeleo ya sekta hiyo.

Alisema ingawa kuna tatizo kubwa la ajira ambalo limefanya watu wengi kukimbilia kujiajiri wenyewe, kuna changamoto kubwa katika sekta hiyo hasa sera na uwapo wa mlolongo wa taasisi zinazopishana mamlaka na huku wakiwa ndio wanatoa leseni.

Alizitaja taasisi hizo zinazopishana mamlaka kama Shirika la Viwango nchini (TBS), Mamlaka ya Chakula na Dawa (TFDA) mamlaka ya kodi (TRA) halmashauri mbalimbali nakadhalika.

Alisema mabadiliko ya kisera yatawezesha kutengeneza muundo unaojali ukuaji wa sekta hiyo hasa kwa kuangalia kodi zinazolipwa ambazo kwa sasa ni za aina moja bila kuangalia uwekezaji unaohusika.

Sekta hiyo ya wajasirimali wadogo na wa kati yenye watu milioni 3 kwa mujibu wa utafiti wa mwaka 2012 inakabiliwa na tatizo la kutokua kutokana na vikwazo mbalimbali vikiwemo pia kukosekana kwa mafunzo ya ujasirimali na uwezo wa kupata fedha za mtaji.

"Ni dhahiri upatikanaji wa fedha kutoka nje ili kuendeleza mtaji ni tatizo. Lakini tatizo hili linakuwagumu zaidi kutokana na riba kubwa, uchelewefu wa kupata mikopo, rushwa katika utoaji na ukosefu wa nidhamu ya fedha kwa wakopaji” alisema Hossana.

Alisema pamoja na mambo hayo kuna matatizo mengine makubwa yanayokwamisha ukuaji wa sekta hiyo. Matatizo hayo mengine ni gharama kubwa zinaootokana na haja ya kukidhi masharti ya uendeshaji wa viwanda hivyo vidogo na vya kati, tozo zinazojirudia, ukosefu wa soko na elimu ndogo ya wajasirimali.

Alisema mabadiliko ya kisera yatasaidia kuimarisha sheria na kuweka sawa mwelekeo wa sekta hiyo kwa kuzingatia kwamba inahitaji mchango mkubwa wa nje ili kukua.

Alisema mathalani ingawa kuna SACCOS, taasisi hizo zinashindwa kwenda kukopa kutokana na riba kubwa na kuwapo kwa mfumo wa kodi na makato mengine yakiwemo ya tozo usiokuwa na tija.

Alisema suluhu nyingine inayostahili kufanywa ni kwa taasisi za kifedha kufuata tabia njema za kimataifa za utoaji wa mikopo unaozingatia pamoja na mambo mengine ukubwa wa mikopo na malipo kwa kuangalia manufaa ya kiuchumi.

"Ili viwanda hivi vya chini na kati kukua masuala ya kifedha na yasiyo ya kifedha ni lazima yaangaliwe na kushughulikiwa..." alisema.

Matatizo mengine ni pamoja na sekta hiyo kukosa msaada huku taasisi mbalimbali zinazohitaji kushirikiana zikifanya vitu kila mmoja na wake.

Taasisi hizo ni SIDO, TRA, WDF, YDF, BRELA na pia miundombinu inayokera katika maeneo hasa ya vijijini.

Pia ili kukuza sekta hiyo ni vyema serikali ikatengeneza miundombinu inayojkidhi haja ya ukuaji wa sekta hiyo kama maghala, masoko, barabara, maji, umeme kwa lengo la kupunguza gharama za kufanya biashara.

Pia utafiti huo ulishauri kwamba serikali ni lazima kutenga fungu ambalo litatumiwa na taasisi kama SIDO, NEEC na hata maofisa biashara wa wilaya kwa ajili ya mafunzo ya ujasirimali na uendeshaji wa biashara.

Mapema Mkuu wa idara ya utafiti na machapisho wa ESRF Profesa Fortunata Makene, aliwataka washiriki wa warsha hiyo kutoa michango katika kuboresha uelewa ili serikali iweze kutatua kizungumkuti cha ukuaji wa sekta hiyo.

Read More

ZISHINDE CHANGAMOTO UFANIKIWE MAISHANI.UKUMBWA WA CHANGAMOTO NDIO UKUMBWA WA MAFANIKIO YALIYOKO MBELE YAKO”.Makala ya Uchumi..

Maisha ya Mwanadamu yamejaa mitihani na majaribio  ambayo ukifaulu unaingia kwenye ngazi nyingine ama kiwango kingine cha elimu,uchumi,mahusiano na kazi.

Wakati  tukiwa tunasoma  mashuleni ili kuingia darasa lingine ama kidato,mwaka mwingine wa masomo  lazima upate mtihani ama majaribio ya kukupima kama unakidhi vigezo na viwango vya kuelekea katika hatua nyingine ya masomo.

Maisha tuliyonayo yana mitihani na majaribio ambayo tumezoea  kuyaita Changamoto ,mbele ya changamoto kuna hatua nyingine zaidi ukiivuka changamoto ila usikubali kuishia hapo hapo  kwasababu Mbele ya changamoto kuna kukua na kuongezeka.Nyuma ya changamoto kuna kudumaa,kudhoofu na kufa.

Katika safari ya kuyaelekea mafanikio kukutana na mafanikio ni lazima cha msingi usikate tamaa na kurudi nyuma jipe moyo songa mbele mpaka uyafikie mafanikio.

Vikwazo hivi vinafanana na virunzi mbele ya wanariadha wanaopiga mbio kuulekea ushindi ambayo ndio mafanikio.Unatakiwa kuviruka na kuulekea ushindi.Usibaki kwenye vizunzi sio mwisho uko ushindi mbele yako ruka upige mbio ufikie.

Katika Maisha wako walioruka virunzi na kufikia mafanikio/ushindi lakini pia wako waliobakia kwenye virunzi bila kusonga mbele na kubakia hapo wakilaumu virunzi,kuwalaumu wenzao,wazazi,walezi na serikali badala ya kuruka virunzi wayafikie mafanikio.

Hakuna mtu anaweza kuzuia mafanikio yako isipokuwa wewe mwenyewe.Maisha ni siri siri ya maisha yako unayo wewe na Muumba wako.

Amua kuruka virunzi,kusonga mbele,amua kushinda,kuzishinda changamoto zinazokukabili.Usiogope Utashinda.

Usiishi kwa kuziogopa changamoto jivike moyo wa ujasiri na kuamini kuwa umezaliwa ili ushinde na sio kushindwa.

Unaweza ukawa mshindi lakini si kwa mapambano yote ,weka nia ya kushinda ongeza bidii,ubunifu na nidhamu unaweza kuwa mshindi.

Utazikimbia changamoto mpaka lini wakati ndio mlango wa mafanikio,jitaidi uingie usitishwe na ukubwa wa mlango kwani “UKUMBWA WA MAFANIKIO NDIO UKUMBWA WA MAFANIKIO YALIYOKO MBELE YAKO”.

Changamoto si adui ni rafiki anayetaka kukupeleka kwenye hatua nyingine ya ubunifu,maboresho na mafanikio .

Changamoto zinakutaka ukatae kuishi kwa mazoea,kufanya kazi kwa mazoea,kufanya biashara kwa mazoea,kuongoza kwa mazoea,kubadilika kulingana na wakati na mahitaji ya watu.kwasababu dunia tunayoishi ina kila aina ya ushindani.

Watu wasiotaka kubadilika wanazichukia changamoto kuzipiga vita badala ya kuzielewa na kukabiliana nazo na kuzishinda hivyo wanajikuta wakigonga ukuta ama kuangukia pua.

Kwenye maisha hakuna kitu rahisi hivyo bidii na nidhamu ni kitu muhimu sana katika maisha ya mtu yoyote anayehitaji mafanikio iwe katika uchumi,elimu,mahusiano,siasa.

Haijalishi una ndoto kubwa kiasi gani lazima ndoto hiyo ipite kwenye barabara ya changarawe,miba,mawe ,mabonde ambazo ndio changamoto ili ziweze kufanikiwa.

Hakuna ndoto iliyowahi kupita redcarpet ndoto nyingi zimepitia magumu mpaka zikafanikiwa,hivyo ukiwa na ndoto usitegemee kupigiwa makofi.Hata dhahabu hujaribiwa kwa kupitishwa kwenye moto ili iwe safi na yenye thamani kubwa.

Na Ferdinand Shayo,Arusha.

ferdinandshayo@gmail.com

0765938008

Read More