Watu 11 wafariki katika milipuko ya mabomu Nigeria

Watu wasiopungua 11 wakiwemo maafisa watano wa polisi wameuawa katika miripuko miwili ya mabomu iliyotokea katika eneo lililoathiriwa na machafuko huko kaskazini mashariki mwa Nigeria. Miripuko hiyo ya mabomu ilitokea huko Maiduguri  makao makuu na mji mkubwa zaidi katika jimbo la Borno kwa kupishana dakika kadhaa. Msemaji wa polisi Gideon Jibrin ameeleza kuwa raia watatu waliuawa baada ya gari moja kuripuka na maafisa watano wa polisi walifariki dunia baada ya bomu la pili lililokuwa limetegwa kwenye gari la polisi kuripuka dakika kumi baada ya mripuko wa kwanza. Msemaji huyo wa polisi ameongeza kuwa hata hivyo bado hawajafahamu iwapo watu wengine watatu waliouliwa kwenye mripuko wa pili walikuwa ni wategaji mabomu hayo au la. Mbali na miripuko hiyo ya jana, watu wengine 20 waliuliwa pia Jumapili wiki hii katika mripuko uliotokea kwenye soko moja huko Bama katika jimbo la Borno.