Wakimbizi wa Kisomali watakiwa kurejea kambini

Kenya Jumanne hii imewaamuru wakimbizi wa Somalia wanaoishi mijini kurudi katika kambi zao katika juhudi za kukomesha mashambulizi ya wanamgambo wa ash Shabab yanayotekelezwa kulipiza kisasi dhidi ya hatua ya Kenya ya kutuma wanajeshi wake katika nchi jirani ya Somalia.

 Joseph Ole Lenku, Waziri wa Mambo ya Ndani wa Kenya ametoa agizo hilo akiashiria changamoto za dharura za kiusalama katika miji ya Kenya, hata hivyo hatua hiyo huwenda ikakabiliwa na ukosoaji wa makundi ya kutetea haki za binadamu ambayo huko nyuma yalipinga hatua kama hizo.

 Waziri wa Mambo ya Ndani wa Kenya amesema kuwa wakimbizi wote wa Kisomali wanaoishi nje ya kambi maalumu za Kakuma na Daadab kuanzia sasa wanatakiwa kurudi kwenye kambi zao hizo na kwamba yeyote atakayekiuka agizo hilo atafunguliwa mashtaka.

 Lenku pia amesema kuwa vituo vyote vya kuwasajili wakimbizi huko Nairobi, Mombasa, Isiolo huko kaskazini na Nakuru kaskazini magharibi vitafungwa. Amewataka pia Wakenya wote kuwaripoti wakimbizi au wahamiaji wowote haramu watakaopatikana nje ya kambi hizo.