Mgogoro wa Syria utaenea nchi zote za eneo.

Amir wa Kuwait Jaber Al-Ahmad Al-Jaber Al-Sabah, amezionya nchi za eneo la Mashariki ya Kati kutokana na vita vya nchini Syria. Amir wa Kuwait ambaye nchi yake mwenyeji wa kikao cha hivi sasa cha viongozi wa Jumuiya ya Nchi za Kiarabu, ameyasema hayo katika hotuba aliyoitoa leo katika kikao hicho na kuongeza kuwa, kila kundi ambalo linadhania kuwa halitaguswa na athari mbaya za mgogoro wa Syria, lijue kuwa linakosea, kwani mgogoro huo utaenea katika nchi zote za eneo hili. Al-Jaber Al-Sabah ameongeza kuwa, kuna haja ya kurejeshwa mgogoro wa Syria katika Baraza la Usalama la Umoja wa Mataifa na kulitaka baraza hilo kumaliza maafa ya nchi hiyo. Amir wa Kuwait ameongeza kuwa, hivi sasa eneo la Mashariki ya Kati lingali linakabiliwa na jinai za kigaidi na kwamba, kuna haja ya kufanywa juhudi thabiti za kupambana na ugaidi. Hayo yanatolewa katika hali ambayo katika kikao hicho, Salman bin Abdulaziz Aal Saud, mrithi wa kiti cha ufalme wa Saudia, ametaka kuungwa mkono zaidi makundi ya kigaidi nchini Syria na kusisitiza kuwa, kiti cha Syria katika kikao hicho kinatakiwa kukabidhiwa kwa mkuu wa muungano wa wapinzani nchini Syria. Kikao cha wakuu wa nchi za Kiarabu kimeanza leo nchini Kuwait chini ya anga ya mfarakano mkubwa kati ya baadhi ya nchi za Kiarabu. Kikao hicho kitajadili hali ya mambo nchini Syria, Libya, Yemen, Palestina na kadhalika suala la kupambana na ugaidi.